ماقدرش اكون كداب

–

ماقدرش اكون كداب وكلامي كله غش

واقف على كل باب وبخمسمية وش

شكلي زي الكباب والطعم اصله مش

مقدرش اقول تعليم وصحة زي الفل

وامدح في حرية وانا لسه طافح ذل

حتى رغيف العيش بقى مش مكفي الكل

وكل شئ بيزيد اشمعنى هو يكش

مقدرش اكون كداب وكلامي كله غش

مقدرش اشوف حالنا واضحك واقول الله

واللي على بالنا صرخة وكلمة آه

واللي بيحكم فينا

بدل ما يرضينا

بنجري احنا وراه

ماشي على مهله

كانه في بيت اهله

اعصابه منجة فريش

مقدرش اكون كداب وكلامي كله غش

مقدرش اكون شمعة للحق متنورش

مقدرش اكون دمعة في القلب متأثرش

مقدرش اكون ضربة في الظلم متعّورش

مقدرش اقول حاضر واسكت واقول معلش

مقدرش اكون كداب وكلامي كله غش

أنور

® طلاب حركة حقي – جامعة القاهرة